ente blogam

വാക്കുവേട്ട

ചുളി വീഴാതെ
ഇന്‍സേര്‍ട്ട് ചെയ്ത്
ചിരിക്കുന്ന വാക്കുകള്‍
എന്റെ മൂര്‍ധാവ് ചതക്കുന്നു.


മാത്രയോരോന്നിലും
പരമസ്വാതന്ത്യ്രം മന്ത്രിച്ച്
ചങ്ങല മുറുക്കുന്നു


സുഖം തിന്ന് ചീര്‍ത്ത്
എന്റെ ചോറ്റുപൊതി കീറുന്നു
പ്രാതലു മുട്ടിച്ച്
എന്റെ പ്രാണനെടുക്കുന്നു


മുഴുത്ത സംഖ്യകളുടെ
വയേറിയക്കണക്കില്‍
എന്റെ ഭിക്ഷ
മറന്നുവെക്കുന്നു


പാര്‍ത്തു നോക്കി
ആത്മാര്‍ഥതക്ക്
വിലയിട്ടു കളിക്കുന്നു


കൂട്ടുചേരുന്നെന്ന്
കുറ്റം ചുമത്താന്‍
കൂട്ടു ചേരുന്നു ഒറ്റയാക്കുന്നു


മിഴി ചിമ്മിയതിന്
പിഴ ചുമത്തുന്നു
സ്വപ്നം കണ്ടതിന്
കപ്പം ചോദിക്കുന്നു


ഉച്ചിയില്‍
ചുളി വീഴാതെ ഇന്‍സേര്‍ട്ട് ചെയ്ത്
ചിരിക്കുന്ന
വാക്കുകള്‍
വാക്കുകള്‍
വിലകെട്ട വാക്കിന്‍
വിഴുപ്പുകള്‍


വിപ്ലവം
ഈ വസന്തത്തില്‍ പിറക്കണം
വേഷം മാറിയ
വാക്കുകൂട്ടങ്ങളെ
വെടിവെച്ചിടാന്‍